今日個女病人我都唔知佢想點。
佢Office裝修，間多啲房比大粒sss坐。佢同其他小薯搬去另外一個角落坐，係對住一部大嘅影印機。佢話啲碳粉令佢有啲氣管敏感。所以想調返出去。當然問過老細比老細Ban咗。
佢就諗辦法想用醫生紙證明佢唔坐得呢個位。
佢同事好豁達，冇乜唔舒服。叫佢開大個窗同開風扇就得。佢覺得咁樣好唔保障，點都想坐返出面。
但係佢離開咗Office其實氣管都繼續敏感。去到半夜瞓覺前先好返啲。佢又冇其他敏感例如眼痕流眼水或者皮膚痕等等。又話搵個唔知咩人嚟度過，話啲空氣乜乜粒數乜乜指數乜乜冇超標。
坦白講，好難100%證明你一定唔坐得呢一個位。你要有個Strong Causal Relationship先證明到一定係個影印機令到你唔舒服。例如一用影印機你先至氣管敏感。一出Office你就即刻冇事。再返入嚟又再喪咳過。咁就機會大啲。
我叫佢去睇專科證明你有氣管敏感，同埋攞啲藥醫好自己先。之後再睇吓點樣證明一定關個影印機事。證明到人哋咪幫你寫囉。不過人哋收幾多錢你就自己打去問左先，唔慌平。同埋唔使旨意你張醫療咭會有得包。
佢之後轉軚，話其實都唔係好想要個證明。話攞個證明出嚟俾老細睇，唔通想同佢反面咩？都係想攞定先保障自己。
😰😰😰😰
如果你唔係諗住留難老細，咁攞個醫生寫證明做乜嘢？而家老細唔俾你換位，你搵其他人噠佢，其實都係夾佢啦？冇得你隊佢出嚟話佢錯，但係又唔當係反面，跟住又要佢就你返俾你換位。俾你換左個位同埋啲大粒ssss一齊坐你估你有好日子過咩？
Any肥，我都係叫佢睇專科，有病點都要醫嘅。要攞醫生證明就錢你點都要俾。世界上冇得你鍾意點就點，但係又要平靚正。攞醫生證明事小，不過D職場 Politics，佢就真係要諗清楚點樣打呢場仗。
～～～
早個月去友人婚禮，呢個係我見過最正嘅婚禮小禮物～～～啲茶葉超香好唔好～～～ 🤤🤤🤤
喺尖沙咀某間酒店擺酒，服務超級麻麻。佢開大啲個冷氣竟然全台嘅杯杯碟碟都跌滿天花灰。要叫佢哋先至肯換杯碟。仲要冇人自動斟茶斟水斟酒斟汽水。你叫佢斟，佢就淨係斟俾你一個，無意識睇吓你張枱嘅其他人其實係咪已經口乾到傻咗。
Search